You are currently viewing Օձեր. Աշխարհի ամենավտանգավոր կենդանիները

Օձեր. Աշխարհի ամենավտանգավոր կենդանիները

Ամբողջ աշխարհում հայտնի է օձերի մոտավորապես 2978 տեսակ, իսկ ՀՀ-ում հայտնի է օձերի 4 ընտանիքի 23 տեսակ։

Ըստ կենսակերպի՝ հայտնի են օձերի հետևյալ տեսակների խմբերը՝

  • ցամաքային,
  • կիսաջրային,
  • ծովային

Տարբեր տեսակների հասուն օձերի մարմնի երկարությունը 7,5 սմ-ից – 12մ  է, զանգվածը՝ 5 գ-ից 200 կգ, կյանքի տևողությունը՝ 8-40 տարի։

Գանգի ոսկորները միացած են շարժուն ձևով, իսկ ստորին ծնոտի աջ ու ձախ աղեղները՝ ձգվող կապաններով, ինչն ապահովում է օձերի բերանի լայն բացվածքը և նրանց թույլ է տալիս առանց ծամելու մանրացնել և կուլ տալ անգամ խոշոր կենդանիներին։ Ատամները շատ սուր են, կեռանման, հետ ծռված։ Ողերն ու կողերը բազմաթիվ են, գրեթե միանման։ Կրծքավանդակ չունեն։ Զուրկ են վերջույթներից, միայն որոշ տեսականերում պահպանված են հետին վերջույթների մնացորդներ։ Դրանք որոշ տեսակների մոտ արտահայտված են նաև հետանցքի կողքերում գտնվող զույգ ճանկերի տեսքով։

Օձերի թոքերը զարգացած են անհամաչափ. աջը սովորաբար ուժեղ է զարգացած և զբաղեցնում է մարմնի առջևի 2/3 հատվածը։ Շնչառությունը կատարվում է մարմնի բոլոր մկանների կծկումների շնորհիվ։ Անհանգստության ժամանակ առաջացող խորը շունչը ուղեկցվում է յուրահատուկ ֆշշոցով։

Արտաքին ականջ չունեն, լսողությունը գրեթե զարգացած չէ, տեսողությունը զարգացած է համեմատաբար լավ։

Հիմնական զգայարանը վերին ծնոտի առջևի մասում տեղադրված յակոբսոնյան օրգանն է. օդում և առարկաների վրա առկա քիմիական միացությունների մոլեկուլները լեզվով հավաքելով՝ փոխանցում է յակոբսոնյան օրգանների մակերեսին, որի միջոցով տարբերակում է նյութերի ծանոթ և անծանոթ լինելը։ Սնվում է բացառապես կենդանական ծագման կերով, այդ թվում՝ լեշերով։

Տարածվածությունը

Օձերը տարածված են երկրագնդի բոլոր անկյուններում, բայց տեսակների բազմազանությամբ շատ են հատկապես արևադարձային երկրներում։ 

ՀՀ-ում հիմնական մասն ապրում է նախալեռնային կիսաանապատների, տափաստանների անտառային և մերձալպյան գոտիների քարքարոտ զառիվայրերում, ժայռերում, քարակույտերում և այլուր։

Կենսակերպ

Օձերը վարում են ցամաքային, կիսաջրային, ծովային, ծառաբնակ և ստորգետնյա կենսակերպ։ Ունեն ճկուն, վերջավորություններից զուրկ մարմին, որը մերթ պարանի պես ոլորվում է, մերթ անսպասելի ուժով ուղղվում է և գետնին գալարվելով սողում։

Բազմացում

Բազմանում է ձվադրությամբ, ձվակենդանածնությամբ կամ կենդանածնությամբ (2-100 ձու)։ Ձվերը ծածկված են փափուկ թաղանթով։ 

Օձի չոր մաշկը ծածկված է թեփուկներով։ Տեղաշարժվում է՝ փորի վրայի թեփուկներով գետնին հենվելով. եթե թեփուկները շփման հենարան չունենան, օձը շարժվել չի կարողանա։ Դրա փոխարեն օձերը հեշտությամբ սողում են ծառն ի վեր. այդ դեպքում նրանց օգնում է հզոր մկանունքը։ Օձերը նաև լողում են։ Անակոնդան, հսկա վիշապօձը կամ ջրային լորտուն երկար են մնում ջրում։ Իսկ ծովային օձերի ողջ կյանքն անցնում է ջրում։

Օձերը նայում են անթարթ, նրանց աչքերը կոպեր չունեն, ծածկված են լոկ թափանցիկ թաղանթով։ Ժամանակ առ ժամանակ օձերը մաշկափոխվում են, նույնիսկ աչքերի վրայի կլոր, թափանցիկ թաղանթն է ընկնում։ Բայց այդ կիսաթափանցիկ մաշկը չպետք է շփոթել օձի կաշվի հետ։ Կաշին մնում է և նույնիսկ այնպես է փայլում, ասես լաքած լինի։ Մաշկափոխությունից հետո օձերն արտակարգ գեղեցկանում են։

Շատ թունավոր շառաչող օձերի պոչի ծայրին կան եղջրային բոժոժներ։ Որևէ կենդանու նկատելիս օձը վեր է ցցում պոչն ու թափահարում բոժոժները, որոնց շառաչյունն ազդանշան է, թե ինքը նկատել է կենդանուն, և պետք չէ իրեն մոտենալ, այդ թվում՝ նաև մարդուն:

Հարձակում

Մարդկանց վրա օձերը գրեթե չեն հարձակվում։ Օձը խայթում է, երբ նրան տրորում են կամ ձեռքը մտցնում նրա թաքստոցը։ Օձի թույնը որսի և պաշտպանության նույնպիսի զենք է, ինչպես գիշատիչների ժանիքներն ու ճանկերը։ Թույնն արտադրվում է գլխի 2 կողմերում տեղադրված հատուկ գեղձերում, որտեղից ծորաններով անցնում է թունավոր ատամների մեջ։ Օձերը չեն կծում, այլ «կտցահարում» են՝ թույնը ներարկելով ատամներով առաջացրած վերքի մեջ։ Ատամները շատ սուր են, կեռանման, հետ ծռված։ Այն, ինչը սխալմամբ խայթ են անվանում, պարզապես օձի լեզուն է, որ միշտ «պարում» է նրա շուրթերի շուրջը։ Լեզուն շոշափում է շրջապատը, այն օձի շոշափելիքի օրգանն է։ Շառաչող (բոժոժավոր) օձի աչքերից քիչ ներքև կան 2 փոսիկներ։ Դրանք ընկալում են կենդանիների մարմնից անջատվող ջերմությունը՝ զանազանելով ջերմաստիճանի մեկ հազարերորդականի հասնող տարբերությունները։ Այդ պատճառով էլ օձը կարող է հանգիստ որս անել լիակատար մթության մեջ։

Գիտնականները ջանում են բացահայտել օձի այդ օրգանի գաղտնիքը և դրան նմանվող սարք պատրաստել։

Բացի թունավոր օձերից՝ կան նաև բազմաթիվ ոչ թունավոր օձեր։ Մարդիկ հաճախ անխտիր ոչնչացնում են օձերին. փոքրերին՝ թույնի վախից, մեծերին՝ հանուն շահույթի. օձերի կաշվից գեղեցիկ պայուսակներ, գոտիներ և կոշիկներ են պատրաստում։

Օձի թույնի օգտակարությունը

Օգտակարությունն այն է, որ նրանց թույնից պատրաստում են արժեքավոր դեղորայք, իսկ թունավոր օձերի խայթոցի դեմ հատուկ շիճուկ են կիրառում։ Օձի թույն ստանալու նպատակով այժմ օձեր են բազմացնում բուծարաններում։ Օձից թույնը վերցնում են՝ նրան ստիպելով «կծել» ապակե փոքրիկ բաժակի շուրթը։ Շատ օձեր ամիսներ շարունակ թույն են տալիս։

Օձերն այլ օգուտ էլ են տալիս՝ ոչնչացնում են բազմաթիվ վնասատու կրծողների։


Ուշադրություն.

Կան օձեր, որոնց մարդը, եթե անգամ հեռվից է տեսնում, արագ պետք է հեռանա տարածքից: Այդպիսիք են՝

  • Գյուրզաները շատ տարածված են Հայաստանում, Ղազախստանում, Անդկրկովկասում: Գյուրզայի 50 մլ թույնը լրիվ բավարար է կենդանի օրգանիմին մահվան հասցնելու համար:
  • Սև մամբան շատ տարածված է Հարավային Աֆրիկայում: Այն ամենաարագաշարժ օձերից է: Սնվում է կրծողներով: Հետաքրքիրն այն է, որ այս օձը կարող է այնքան խայթել իր զոհին, մինչև վերջինս չմահանա թույնից: Խայթոցից հետո մարդու մոտ առաջանում է ուժեղ գլխացավ և սրտխառնոց:
  • Աֆրիկյան բումսլանգը աշխարհի ամենաագրեսիվ օձերից է: Բումսլանգի թույնը ավելի վտանգավոր է քան թագավորական կոբրայինը: Կարողանում է հեշտությամբ մագլցել ծառերը և վնասել անգամ ամենափոքր թռչուններին; Խայթոցից հետո մարդու մոտ առաջանում է ներքին և արտաքին օրգանների արյունահոսություն:
  • Ավստրալական թայպանը տարածված է Ավստրալիայում: Խայթոցից հետո կանգ է առնում արյան շրջանառությունը և մկանները անշարժանում են:
  • Ծովային բելչերան ապրում է ջրերում: Ճիշտ է այն ագրեսիվ չէ, բայց միևնույնն է նրա թույն ավելի թունավոր է, քան այլ օձատեսակներինը: Հանդիպում է Ասիայի և Ավստրալիայի ջրերում: Այն չի խայթի ձեզ, եթե դուք նրան չվնասեք և մոտ չգաք: Խայթոցից հետո մկանները անշարժանում են և եթե 3 րոպեից հիվանդին չտեղափոխեն հիվանդանոց, ապա նա կմահանա:

Նյութը պատրաստեց Ժաննա Կոբելյանը

Մեկնաբանել