Բարև։ Ես Անյուտան եմ։ Ծնվել, մեծացել եմ Սարավան գյուղում։ Ուզում եմ պատմել քեզ իմ գյուղի մասին ու նրա առանձնահատկությունները։
Սարավան գյուղը գտնվում է իմ շա՜տ սիրելի Վայոց Ձորում։ Թեև գյուղի տարածքը զուրկ է զարգացման և տեխնոլոգիական առաջընթացից, սակայն ունի մի շարք առավելություններ։ Գյուղի պարզությունը, մաքրությունը, խաղաղությունը արդեն իսկ առանձնահատուկ են։ Գյուղը իսկական միջավայր է առողջ լինելու համար։ Երջանիկ են նրանք, ովքեր կերտել են պատմություն հենց այս գյուղում։
Իմ սիրելի տեղը մեր սարն է՝ գյուղի ամենաբարձր հատվածը, որտեղից ես դիտում եմ ամբողջ գյուղը, այն ինձ հաղորդում է կատարյալ ներդաշնակություն։ Սիրում եմ զգալ այն, ինչ յուրահատուկ է ինձ համար։ Ես սիրում եմ գնալ այնտեղ և ժամանակ անցկացնել, այնտեղից երևում են նաև խոտածածկ տարածքներ և բլուրներ: Նկարչի համար դա նկարելը կատարյալ կլինի:
Գյուղացիների հիմնական զբաղմունքը հողագործությունն է, անասնապահությունը, մեղվապահությունը, այգիների մշակումը։ Երբ գալիս եմ իմ գյուղ, անսահման հաճույք եմ զգում նրա խաղաղ ու հանդարտ միջավայրի պատճառով: Այստեղ ես վայելում եմ թարմ և մաքուր օդը և սնվում եմ գյուղական բարիքներով: Իմ գյուղի մարդիկ շատ օգտակար են, և նրանք ապրում են ներդաշնակության մեջ՝ առանց վրդովմունքի: Նրանք ապրում են որպես մեկ մեծ ընտանիք, որը միշտ հոգ է տանում միմյանց մասին: Քաղաքում դժվար թե կարողանանք գտնել այս կարեկցանքը: Իմ գյուղը փոքրիկ կացարան է երջանիկ մարդկանց համար։ Այստեղ նրանք ապրում են ներդաշնակության և խաղաղության մեջ: Գյուղի բնակիչները շատ աշխատասեր են, և հյուրասեր։ Գյուղում կա նաև դպրոց, գյուղապետարան, փոստատուն, բուժկետ, ճաշարան։
Գյուղացիների աշխատանքը պետք է գնահատվի, քանի որ հենց գյուղացին է երկրի տնտեսության զարգացման հիմքը։
Բնակչությունը զբաղվում է անասնապահությամբ, ծխախոտագործությամբ, հացահատիկի, կերային կուլտուրաների մշակությամբ և պտղաբուծությամբ։ Հիմնվել են նաև այգիներ։
Գյուղի տարածքում կա նաև մի գետ՝ դա Դարբ գետն է։ Դարբ գետի ջուրը օգտագործվում է ոռոգման նպատակով։ Դարբը Արփա գետի ձախ վտակն է։ Ջուրը սառն է, մաքուր։ Հրաշալի է ամռանը լողանալու համար։
Կա նաև լիճ, որը տարիների ընթացքում ցամաքել է, վերածվելով փոքրիկ ճահճի։ Լճի ցամաքելու հետ մեկտեղ լճի տարածքից հեռացել են նաև վայրի բադիկները իրենց ձագուկների հետ միասին։ Հիշում եմ ՝ մի օր հայրիկս ինձ համար բերել էր նման մի վայրի փոքրիկ բադիկի, որը կորցրել էր իր մայր բադին։ Այժմ մենք ունենք վայրի սագեր, որոնք ամեն անգամ հարձակվում են ինձ վրա և ինձ թույլ չեն տալիս անգամ այգի մտնել։ Այդ իսկ պատճառով ես չեմ կարողանում մեր այգի մտնել և ցոգոլ ուտել։
Նկարում նույնիսկ լճի ճահճացած տարածքներն են երևում։ Մի քանի տարի անց ամբողջը կցամաքի ու արդեն հետք չի մնա։
Գյուղս լեռնային է։ Մի՞թե գեղեցիկ չեն սարերը ու կանաչապատ տարածքները։ Ահա մի քանի պատկեր.
Գյուղի տարածքում կա դպրոց, որը 9ամյա է։ Ես հաջողակ եմ, որ կերտել եմ անմոռանալի պատմություններ հենց այս դպրոցում։ Մեր դպրոցը հագեցած է մոդեռն տեխնոլոգիաներով։ Հարմարավետ է։ Ուսուցիչները հիանալի են, կրթված։ Տալիս են շատ մեծ գիտելիքներ։ Ամբողջ դպրոցում սովորում է 19 աշակերտ (2023-2024 ուս.տարի)։
Գյուղի տարածքը ասֆալտապատ է, մաքուր։ Գյուղում միշտ զգալի է սառը զեփյուռի քնքշանքը։ Թեև գյուղում շատ ցուրտ է, մենք տան պայմաններում աճեցնում ենք նարինջ։ Գյուղում գյուղատնտեսական գործունեություն ծավալելու առթիվ կառուցվել են ջերմոցներ, գյուղացիներին ընձեռնել են բանջարեղեն ( հիմնականում ՝ վարունգ և լոլիկ) աճեցնելու հնարավորություն։
Գյուղացիները պահում են նաև ընտանի կենդանիներ ՝ խոզեր, հավեր, կովեր, գառներ, եղջերավոր անասուններ։ Մենք պահում ենք նաև գեղեցիկ աղավնիներ, ինչպես նաև շատ գեղեցիկ վայրի սազամներ։ Ապրիլից դաշտերում կարող եք գտնել տարբեր տեսակի սնկեր։ Սնկերից տարածված են հատկապես շամպինիոնները։ Դրանցից կարող եք պատրաստել շատ համեղ կերակրատեսակներ։ Կարելի է պահել սառնարանում հետագա օգտագործման համար։
Սարավանի սարերում կարող եք հանդիպել տարբեր կենդանիների՝ արջ, գայլ, աղվես, ոզնի և այլն, թռչուններից՝ լոր, ծիծեռնակ, արծիվ։ Մեր գյուղում կան շատ թունավոր սողուններ։ Սարավանում երբեք չեք կարող հանդիպել արագիլների՝ ցուրտ կլիմայի պատճառով։
Մեծ սիրով ներկայացրեցի իմ ծննդավայրը, հուսով եմ հետաքրքիր էր ։)
Իմ ամենախելացի Այնուտա ջան:
Դու լավագույնն ես.:
Շնորհակալ եմ Անյուտա ջան մեր գյուղը այսքան գեղեցիկ ներկայացնելու համար ❤ Իսկապես Սարավանը մի ուրիշ աշխարհ է այնտեղ ապրողների համար ❤