Ինչպե՞ս են գոյանում մարգարիտները և ինչու՞ են դրանք այդքան թանկ:

Երբ տեսնում ենք տատիկի կամ մայրիկի վզին այս հրաշք քարերից ապարանջանը, որոնց նրանք այնպիսի խնամքով են վերաբերում, մեր ուղեղում ծագում է վերը նշված հարցը: Ավելին, երբ իմանում ենք, թե ինչպես են առաջացել՝ ուղղակի ապշում ենք: Մարգարիտները միակ թանկարժեք քարերն են, որը երկար մշակում չեն պահանջում։

Հին ժամանակներում հավատում էին, որ մարգարիտները սիրո և բարգավաճման խորհրդանիշներ են մարդկանց կյանքում: Շատ երկար ժամանակ մեր նախնիները պնդում էին, որ այն մարդուն տրվել է աստվածների կողմից: Յուրաքանչյուր մարգարիտ յուրահատուկ է։ Մարգարիտների բնական ստեղծողները ծովային թագավորության խորքերում (Ավստրալիա, Պարսից ծոց, Թաիլանդ և այլն) ապրող ոստրեներն են։

Մի փոքր խոսենք ոստրեների մասին, որպեսզի պարզ լինի, թե ովքե՞ր են այդ հրաշագործները:

Ոստրեները ծովային երկփեղկ կաղկամորթներ են։ Նրանք ունեն անկանոն ձևի շատ բնորոշ ասիմետրիկ թաղանթ։ Պատյանը հաստ պատերով է և անհարթ։ Նրա մի մասը ուռուցիկ է (հիմնականում ձախից), որը կպչում է ստորջրյա տարբեր առարկաների, իսկ մյուս հատվածը ավելի փոքր է, ավելի հարթ և բարակ՝ վերին հատվածն է, այն ձևավորում է կափարիչը։ Ոտքեր չունեն, քանի որ նրանք վարում են անշարժ կցված ապրելակերպ։ Ոստրեների մարմնի յուրաքանչյուր կողմում գտնվող 2 բարակ թիթեղներ կան, ինչպես թիկնոցը՝ շողշողացող մազիկներով, որոնք պահպանում են ջրի շարունակական հոսքը կենդանու մարմնի շուրջը։ Այս բոլոր թարթիչավոր մազերի գործողության շնորհիվ կենդանին անընդհատ ստանում է թթվածնով հարուստ թարմ ջուր, ինչպես նաև ծովի ջրում կախված սննդի տարբեր մասնիկներ՝ մեռած և կենդանի փոքր թրթուրներ (կոլենտերատներ, որդեր, փափկամարմիններ և այլն):

Նրանց չափերը տարբեր են՝ հսկա ոստրեները կարող են հասնել 38 սմ երկարության։ Եվրոպական տեսակները սովորաբար ունենում են 7–13 սմ երկարությամբ պատյան։ Թաղանթը բաց է. ջրի հոսքը ազատ է. ջուրը մտնում է պատյանի դիմացի եզրով և դուրս գալիս փորային հետևի եզրերով:

Երկսեռ են: Բարենպաստ պայմաններում մեկ էգը կարող է արտադրել մինչև 500 միլիոն ձու մեկ սեզոնում, այսինքն՝ այս փափկամարմինների վերարտադրողական ներուժը չափազանց բարձր է։ Սպերմատոզոիդները ջրի հոսքով մտնում են էգերի թիկնոցի խոռոչ, իսկ բեղմնավորված ձվերը զարգանում են թիկնոցի խոռոչի հետնամասում։ Մի քանի օր անց շարժական թրթուրները մտնում են ջուրը: Թրթուրներն ունեն լավ զարգացած ոտքեր։ Մի քանի օր լողալով, ոտքի օգնությամբ անչափահասը սողում է՝ ընտրելով վերջնական ցեմենտացման տեղ, որից հետո ոտքը սկսում է նվազել և ամբողջությամբ կրճատվում է ոչ ուշ, քան 72 օր հետո։

Գրեթե բոլոր տեսակները տաք ջրերի սիրահար են, և միայն մի քանի տեսակներ են, որ կարող են գոյատևել սառը ջրում: Ապրում են ինչպես առանձին, այնպես էլ գաղութներով, սովորաբար կոշտ հողերի վրա՝ քարերի, ժայռերի կամ խառը ավազաքարային հողերի վրա։

Ինչպես ափամերձ շատ կենդանիներ, այս փափկամարմիններն ի վիճակի են հանդուրժել որոշ աղազերծում. նվազագույն աղիությունը, որով նրանք կարող են գոյություն ունենալ՝ 12 տոկոս է: Աղիության մակարդակը արտացոլվում է ոստրեների աճի տեմպի և նրանց համի վրա. լավագույնը 20-ից 30 տոկոս աղիությամբ ջրերից հավաքված ոստրեներն են, որտեղ գետի ջրերի կողմից փոքր և մշտական ​​աղազրկում է տեղի ունենում: Մոտ 33-35տոկոս աղիության դեպքում ոստրեները լավ են աճում, բայց նրանց միսը դառնում է կոշտ։ Այս հատկությունը լավ հայտնի էր հին հռոմեացիներին, ովքեր ծովից հավաքված ոստրեները պահում էին աղազրկված փոքրիկ ջրամբարներում:

Մարգարիտները ոստրե մտնող օտար առարկաների նկատմամբ իմունային և պաշտպանական արձագանքի արդյունք են: Պաշտպանվելու համար փափկամարմինն աստիճանաբար գրգռիչին պարուրում է մարգարիտի մորթի շերտով։ Մարգարտյա շերտավորման գործընթացի արդյունքում առաջանում է մարգարիտ։ Մոտ 5 մմ չափի մարգարիտ ստանալու համար պահանջվում է ավելի քան 20 տարի:

Դարեր շարունակ մարգարիտ կրել են միայն հարուստները, թագավորական ընտանիքը և քահանաները, իսկ այժմ նա մի փոքր արժեզրկվել է:

Ինչպե՞ս է ներկայիս օրերում այն պատրաստում:

20-րդ դարի սկզբին Ճապոնիայից մարգարիտ արդյունահանողը բացահայտեց մարգարիտների ծննդյան նվիրական գաղտնիքը և գտավ այդ թանկարժեք քարը արհեստականորեն կորզելու միջոց։ Նա հասկացավ, որ մեծահասակ փափկամարմնի պատյանի մեջ ստիպողաբար կարելի է օտար մարմին տեղադրել (երբեմն պարզվում է, որ միանգամից մի քանի ): Այս կերպ արտադրված մարգարիտները ենթարկվում են խիստ փորձարկման և մանրակրկիտ ստուգման (որակի հսկողություն): Ցավոք սրտի, նույնիսկ ճապոնացիների հորինած մեթոդը չէր կարող մարգարիտները հեշտությամբ հասանելի դարձնել։

Չնայած գիտնականների անվերջ փորձերին՝ առաջատար լինել մարգարիտների արտադրության մեջ, բնությունը դեռևս իրեն վերապահում է այս իրավունքը։ Փափկամարմինները շատ զգայուն են նույնիսկ փոքր ջերմաստիճանի տարբերության նկատմամբ, նրանք բավականին հաճախ տառապում են իրենց միջավայրի և մթնոլորտի աղտոտվածությունից: Բայց կան մասնագետներ, ովքեր անկեղծ ցանկությամբ և եռանդով խնամում են անպաշտպան ոստրեները. նրանք վերահսկում են բոլոր կարևոր նրբերանգները, ջրի ջերմաստիճանը և ժամանակին իրականացնում կեղևի մանրակրկիտ մաքրումը՝ առաջացած կեղտից:

Մարգարիտները «կարող են պարծենալ» իրենց տարբեր գունային երանգներով, քանի որ յուրաքանչյուր մարգարիտ ունի յուրահատուկ ձև և չափ։ Բոլորից ամենաթանկն են հարթ, բավականին մեծ, գեղեցիկ փայլով մարգարիտները: Տարիներ կպահանջվեն բացարձակապես միանման և բարձրորակ մարգարիտներից զարդեր հավաքելու համար։

Մարգարիտներն ընտրվում են հետևյալ չափանիշներով՝ ձև, քաշ, թափանցիկություն, հարթություն և փայլ: Այժմ մարգարիտը կարող է ունենալ բացարձակապես ցանկացած ձև: Օրինակ՝ կիսալուսին, սիրտ, տանձ և այլն։ Թանկարժեք զարդերի արտադրության համար մարգարիտների պատրաստման 3 փուլ գոյություն ունի.

1. Մարգարիտների ընտրությունը պահանջում է մեծ համբերություն, բոլոր տեսակի մարգարիտների իմացություն։
2. Մարգարիտը հանելու ժամանակ պետք է շատ զգույշ լինել, որ այն քերծվածք կամ ճաք չունենա:
3. Բացի այդ, զարդերն ընկնում են առաջին կարգի ոսկերիչների ձեռքը. նրանք ընտրում և զտում են դրանք զարդերի համար:

Մարգարիտները արդյունահանվում են ոչ միայն ծովի խորքերում, այլ նաև գետերի ջրերում: Քաղցրահամ ջրի մարգարիտներ հայտնաբերվել են Հյուսիսային Ամերիկայում, Եվրոպայում և Կանադայում: Ռուսաստանում այս մարգարիտները արդյունահանվել են գետերում՝ Ամուրի վտակներում, Բալթյան ավազանում:

13 հետաքրքրաշարժ փաստ մարգարիտների մասին

1. Հին ժամանակներից ենթադրվում էր, որ բնական մարգարիտները հայտնվում են, երբ լուսադեմին ոստրեները բարձրանում են ջրի երես և բացում իրենց պատյանները՝ դրանց մեջ ցողի կաթիլներ հավաքելու համար: Իսկ հավաքված կաթիլները հետագայում վերածվում են մարգարիտների…

2. Բոլոր ոստրեներն արու են ծնվում և էգերի են վերածվում մոտ երեք տարեկանում:

3. La Peregrina-ն աշխարհի ամենահայտնի մարգարիտներից է և իսպաներեն նշանակում է «անհամեմատելի»: 500-ամյա եզակի մարգարիտը տանձաձև է և հասնում է մեծ աղավնի ձվի չափի։ Նրա տերերն էին Ֆիլիպ II-ը Իսպանիայից, Մերի Թյուդորը, Նապոլեոն Բոնապարտը և Էլիզաբեթ Թեյլորը։

4. Դեռ հնագույն ժամանակներից մարգարիտները համարվում էին գոհար, դրա մասին է վկայում Միջագետքի արտեֆակտը, որը թվագրվում է մ.թ.ա մոտ 2300 թվականով:

5. Յուրաքանչյուր մարգարիտ յուրահատուկ է և ունի իր թերությունները: Երկու միանման մարգարիտ չեք գտնի։

6. Մարգարիտների աճը կարող է տևել մի քանի ամսից մինչև մի քանի տարի, դրա զարգացման վրա ազդում են ջրի վիճակը, փափկամորթի չափն ու տեսակը։ Միջին չափի մարգարիտ կազմելու համար պահանջվում է մոտավորապես 5 տարի։

7. Այսօր մարգարիտների 95%-ն աճեցվում է մարգարիտների ֆերմաներում: Մարգարիտներ հավաքելիս փափկամարմինը կենդանի է մնում և ավելի շատ մարգարիտներ է արտադրում, քանի որ փոքր գնդիկներ են նորից տնկվում նրա մեջ, որոնք այնուհետև վերածվում են մարգարիտների:

8. Մարգարտի գույնը կախված է փափկամարմինի կեղևի ներքին տարրերից և կարող է տարբեր լինել՝ սպիտակից և փղոսկրից մինչև վարդագույն, սև, մանուշակագույն և նույնիսկ ոսկեգույն։ 13500 հազար մարգարիտներից միայն մեկն է վարդագույն լինում։

9. Բոլոր մարգարիտների միայն 5%-ն է աճեցվում աղաջրում։ Akoya, Tahitian և South Sea մարգարիտները աղի ջրով մշակված մարգարիտների երեք հիմնական տեսակներն են: Սովորաբար օվկիանոսի ոստրեները միայն մեկ մարգարիտ են տալիս:

10. Քաղցրահամ ջրի մարգարիտներին բաժին է ընկնում ամբողջ աշխարհում մարգարիտի արտադրության մոտավորապես 95%-ը: Մեկ միդիան կարող է միաժամանակ արտադրել 30-ից 50 մարգարիտ:

11. Մարգարիտների ութ ձև կա՝ կլոր, կիսաշրջանաձև, կոճակներ, կաթիլ, օվալ, օղակ, բարոկկո և կիսաբարոկկո:

12. Pearl-ը 2012 թվականին Անգլիայում և Ուելսում նորածին աղջիկներին տրված 320-ից ամենահայտնի երկրորդ անունն էր:

13. 1916 թվականին Լուի Կարտիեն՝ աշխարհի հայտնի ոսկերիչներից մեկը, Նյու Յորքում առանձնատուն է գնել 5-րդ ավենյուում՝ 1,2 միլիոն դոլար արժողությամբ բնական մարգարիտներից պատրաստված երկու վզնոցով։

Նյութը պատրաստեց Ժաննա Կոբելյանը